Kutob sa mga motorista nga apektado sang bagyo nga Tino kag Uwan ang gintagaan sang extension para mag-renew sang ila nga mga lisensya.
Gin anunsyo sang Land Transportation Office ang nationwide nga pag-waive sang penalties para sa driver’s license renewal kag iban nga mga traffic adjudication transactions.
Para indi bug-at para sa tanan gin-idog ang deadline sa November 28, 2025.
Ang direktiba ang halin kay Acting Transportation Secretary Giovanni Z. Lopez para matagaan sang nagakaigo nga panahon kag indi matam-an sa penalidad ilabi na ang mga pumuluyo sa mga lugar nga lubos nga na apektohan sang sunod sunod nga mga bagyo.
Ini para man nga mabuhinan ang palas-anon sang mga drivers kag motorista nga indi maka renew sang ila nga mga lisensya bangud man sang lapnagon nga suspension sang trabaho sa gobyerno lakip na ang LTO.
Ang mga driver’s licenses nga due for renewal sa Oct. 30, 2025, mangin valid sa gihapon kag wala sang penalidad tubtob sa Nov. 28, 2025.
Pati ang penalidad sa mga motorista nga nadakpan humalin sang October 28 tubtob Nov 12, 2025 ang gina waive man. Buot silingon, ang drivers ang indi i-subject sa masami 30-day suspension nga naga apply kun ang bayolasyon wala ma settle sa sulod sang 15 days humalin sang na isyuhan sang Temporary Operator’s Permit ukon TOP. Ang waiver tubtob man sa November 28, 2025.*