Temporaryo anay nga ginpasirad-an ang alagyan sa old airport nga naga-angut sa Barangay Tangub kag Singcang-Airport samtang natalana ang pag-negotiate sang siudad sa Civil Aviation Authority of the Philippines.
Sirado na ang gate nga nangin alagyan sang mga motorista patabok sa runway sang old airport nga naga-angut man sa gin-construct nga dalan sang siudad pakadto sa subdivision sa Barangay Singcang-Airport.
Suno kay City Legal Officer, Romeo Carlos Ting, Jr., ginpasirad-an sang CAAP ang alagyan amo nga natalana pa sila nga maga-negotiate agud nga mabuksan liwat ang natukod nga alternate road.
Suno kay CAAP – Bacolod Head, Roel Aranzado, gin-deny nila ang request sang siudad para sa pag-gamit sang runway bangud man ang pending nga property dispute sa old airport.
Ang Pamilya Lizares ang damlag nag-file sang reklamo agud mabawi ang ila propiedad nga sadto nakasugtan nga para lang sa airport use.
Ginsiling naman ni Punong Barangay Rosinie Distrito nga nangin dako nga bulig sa mga residente ang dalan bangud ini ang nangin alagyan sang mga residente nga sadto apektado sang pagbaha.