Isa ka poste ang nautod kag nakakas naman ang bahin sang isa pa gid sa dalan Araneta sa Bacolod matapos masalawid sang isa ka 20 footer container van la una kaina sang kaagahon.
Gilayon nga ginsira ang amo nga bahin sang dalan nga yara mismo sa atubang sang Gaisano City Mall kag gin reroute ang traffic. Halos bilog man nga adlaw wala malabyan sang salakyan ang amo nga dalan.
Mga kable sang telepono ang apektado lakip na ang internet service. Suno kay Major Ruel Culanag ang pamuno sang Traffic Management Unit kag Bacolod Traffic Authority Office, nagaluyloy naman gid ang mga kable rason nga nasalawid sang 20 footer container van nga gikan sa reclamation area kag padulong sa sur nga bahin sang probinsya.May salabton suno kay Culanag ang kumpanya sang container van.
Ginkuhaan sang lisensya ang driver pero wala naman ini na detain. Wala naman sang may ginreport nasamaran sa amo mga insidente.