Task Force Disiplina sang siudad sang Bacolod ang wala pa anay nagapang-issue sang citation ticket sa mga persona nga wala nagasuksuk sang face shield sa mga pampubliko nga lugar.
Suno sa pamuno sang task force nga si Wilfredo Geolingo, nagapatigayon sila anay sang information-dissemination sa publiko tuhoy sa bag-o nga ordinansa nga nagamando sa pagsuksuk sang face shield sa mga pampubliko nga lugar magluwas sa face mask kag pagsunod sa social distancing.
Pero sa madason nga semana, pagasugdan na sang task force ang pag-issue sang citation ticket sa mga wala sang face shield.
Sa idalum sang ordinansa, may yara sang pagabayaran nga multa ang madakpan sang task force nga wala gasuksuk sang face mask, face shield kag wala gasunod sa social distancing.
Samtang, nagpanagtag naman sang 9,800 ka mga face shield ang siudad sa mga vendors sang tatlo ka mga dalagko nga merkado pati na sa baligyaan sang bulak, Manokan Country kag mga driver sang trisikad, tricycle kag depasahe nga jeep.
Ang mga face shields ang gikan sa Bacolod City Disaster Risk Reduction and Management Office kag ginpanagtag sang mga katapo sang Sectoral Concerns Office.