Kadungan sang pag anunsyo sang dako nga rollback sa gatong, nag announce man sang untat byahe sa Miyerkules ang transport groups sa Bacolod City.
Base sa payahag ni President Ferdinand Marcos Jr., masobra sa 20 pesos ang roll back sa kada litro sang diesel, masobra sa 4 pesos naman sa gasolina kag kapin sa 9 pesos naman ang sa kerosene.
Apesar sa ginapaabot nga pagnubo sang presyo sang gatong, magapatigayon sang untat byahe ang mga dalagko nga transport groups sa Bacolod sa Miyerkules.
Magasugod ang untat byahe las 6 sang aga kag magatakop ini las singko sang hapon. Kapin sa 1,000 ka mga units sang traditional jeepneys ang ginapaabot nga mag-upod sa amo nga protesta.
Sa idalom sang Magsaysay Flyover, magatipon ang mga katapo sang KNETCO-PISTON, sa Bata Flyover naman ang BACOD-MANIBELA, kag sa dalan Burgos naman ang UNDOC-PISTON.
Maga-ugyon man sa ila nga protesta ang pila ka mga simbahan sa siudad.
Panawagan ni Rudy Catedral, presidente sang BACOD-Manibela sa pumuloyo nga intsindihon lang anay ang mga drayber bangud may kawsa man ang mga ini nga ginapakigbato, dala sang padayon nga pagsaka sang presyo sang gatong.
Suno sa iya, wala pagid sila sang klaro nga pagsulundan kon san-o kag sin-o nga mga jeepney drivers ang makabenepisyo sa ayuda gikan sa gobyerno nasyonal.
Nagapanawagan man siya sa mga buluthuan sa Bacolod nga kon pwedi, suspendihon anay ang klase sa Miyerkules agud mag ugyon para sa ila pagahiwaton nga untat byahe.
Natapos na ang klase sang elementary tubtob senior high school apang nagapadayon pa sa gihapon ang klase sang kolehiyo.
Subong lang nga hapon sa isa ka press conference gin anunsyo sang presidente nga ginpakakas na ang excise tax sa LPG kag kerosene. P3.36 sa kada kilo sa LPG kag P5.60 sa kada litro sang kerosene.
“Kabay nga updan, kag kon pwedi mahimo wala nalang sang klase kag updan kita sa aton nga mga ginahimo nga rally protesta. Kay mas maayo nga damo kita ang nagademanda sa aton nga national agencies nga dulaon ang excise tax kag value added tax kag ining TRAIN law dapat dulaon para indi mahatagan sang kahigayunan ang mga dalagko nga kapitalista”, suno kay Catedral.*
[sibwp_form id=1]