Tungod sang padayon nga pag mutate sang Covid-19, indi man malayo suno kay vice presidential candidate Dr. Willie Ong ang pagluntad sang panibag-o nga surge ukon pagsaka sang kaso sang Covid-19 sa pungsod kasubong sang natabo sa mga kaiping nga pungsod sa Asya.
Nagapati si Ong nga indi na kinahanglan ang pagpatuman sang lockdown kun may nagakaigo nga pagpanghanda ang national kag local government sa tion nga posible magsaka ang Covid-19 cases sa Mayo.
Kaupod ni Ong ang senatorial candidate sang Aksyon Demokratiko nga si Dr. Carl Balita sa pagpangampanya sa Bacolod.
Suno kay Balita, dapat man tagaan atensyon sa pandemic recovery programs ang paghatag dugang nga benepisyo sa mga nurses kag iban pa nga health personnel.
Indi man abi malayo suno sa iya ang posibilidad sang kakulang sang nurses sa mga ospital sa madasun nga duha ka tuig.
Ang pagtukod sang regional health centers sa pungsod ang kabahin sa mga prayoridad sang partido sa idalom sang Isko Moreno Domagoso kag Willie Ong tandem.
Gin ako man nanday ong kag balita ang mga kabudlayan sa pihak sang resulta sang mga survey ilabi na nga halos wala naman naga upod sa ila si presidential candidate Isko Moreno.
Pero pinaagi sa natukod nila nga health tandem,sila ang magapadayon nga magakampanya para sa ikaayo sang public health.