Councilor Thaddy Sayson ginpaathag kun ngaa may price disparity sa ginbakal nga duta sang siudad sa Barangay Granada kag Felisa.
Gin-ratify na sang konseho sang Bacolod ang land acquisition sa malapit 75 ektarya nga duta nga ginduso sang Landbanking Committee.
Kapin sa P975M ang ginbakal nga duta nga gintalana para sa dugang nga housing project kag sa itukod nga bag-o nga patyo sang siudad.
Kun tan-awon may kapin P800 ang price disparity ang nabakal nga propiedad sa tig-P1,300 per square meter kun ikumparar sa tig-P500 per square meter nga duta nga pagabaklon sang siudad sa Barangay Felisa agud tukuran sang landfill kag recycling facility.
Paathag ni Councilor Sayson, pamuno sang Comittee on Finance sang konseho, nabase sa zoning ang separado nga land acquisition kag sa valuation sang Bureau of Internal Revenue kabangdanan nga may price disparity sa propiedad.
Gin-classify nga residential area ang nabakal nga duta sa Barangay Granada kag agricultural naman ang malapit 25 ektarya nga duta sa Barangay Felisa.