Nakibot ang isa ka residente sa Sitio Lupni, Barangay Hilamonan sa Kabankalan City nga may nag-gahod sa gwa sang ila balay, mga las 3 sang kaagahon sang Lunes, Hulyo 20.
Pag-gwa ni alyas “Jennylyn”, iya nakit-an ang isa ka lalaki nga nagahigda kag wala na nagagiho malapit sa gin-install nga electrical perimeter fence. Indi niya kilala ang lalaki.
Nagwa sa imbestigasyon sang Kabankalan PNP nga nahikapan sang lalaki ang live wire sa kudal nga nagapalibot sa manokan.
Ginkilala ang napatay kay alyas “Rey”, 24-anyos, taga Sitio Pasto sa Brgy. Hilamonan.
Suno kay alyas “Jennylyn”, nakahibalo ang mga pumuluyo sa lugar nga may kuryente sa nasambit nga kudal rason nga wala sang may nagapalapit sa sini nga private property.
Ginsiling ni Police Lt. Gilbert Alunan, deputy chief sang Kabankalan PNP, padayon pa ang imbestigasyon agud mahibaluan kun ano ang rason nga yara sa lugar ang lalaki.
[sibwp_form id=1]