Las sais kaina sang aga madul-ong kun tani si Bebot Amador sa iya nga hinablos sa eskwelahan pero sang hana na siya masakay sa iya nga salakyan, may nakita siya nga bangkay sang isa ka lalaki malapit sa iya nga salakyan.
Gani nangayo siya sang bulig sa mga tricycle driver.
Mismo sa atubang sang Fr. Gratian Murray Integrated School nasapwan ang bangkay ni Erwin Abetong nga isa ka construction worker. May mga pilas siya tuga sang pagbuno.
May pares pa sang simagol nga nabilin malapit lang sa iya nga bangkay.
Suno sa live in partner sang biktima nga si Jenny Ann Deocampo, natingala sila nga wala na makapauli si Erwin sang kagab-i. Iya pa ini nga ginpangita.
Pero suno pa sa misis sang nagligad lang nga bulan, nakabaton sang mensahe ang iya sini nga mister gikan sa indi nila kilala nga account sa messenger. Ginapahog ini nga may malain nga matabo sa iya.
Ginatipon na sang pnp ang tanan nga mga ebidensya kag pahayag gikan sa pamilya sang biktima kag ila na gina usisa ang kaso para makilala ang suspek kag kun ano ang motibo sa pagpatay sa iya.