Dungan nga nag-file kaina sang ila certificates of candidacy sanday incumbent Congressman Greg Gasataya kag staff nga si Atty. Mark Mayo sa Comelec-Bacolod.
Ginklaro nila nga sa idalom sang Nationalist People’s Coalition sila ang magapabilin nga neutral sa tion sang kampanya.
Si Gasataya ang liwat nga magapapili sa pagka-kongresista sang siudad kag magapapili naman si Mayo sa pagka-konsehal. Ila man ginsiling nga wala sila sang ihibalo tuhoy sa nagalapta nga listahan sang mga kandidato nga naga-angut sa ila kay anay congressman Albee Benitez.
Si Benitez ang natalana nga mangin kasumpong ni incumbent Mayor Evelio Leonardia sa mayoralty elections.
Sang Sabado pormal man nga gin-anunsyo ni anay konsehal Atty. Caesar Distrito ang tuyo nga pagpapili sa pagka-bise alkalde bilang ka running mate ni Benitez.
Upod sa iya iloy nga si Incumbent Councilor Simple Distrito, Councilor Bart Orola kag Pau Sy nga anak sang nagtaliwan nga si Councilor Elmer Sy, sila ang nagdesisyon nga magbiya na Grupo Progreso nga ginapamunuan ni Leonardia.
Sila ang natalana magafile sang certificate of candidacy bwas dungan kay Benitez.
May the best man win naman ang nangin reaction ni incumbent Vice Mayor El Cid Familiaran sa pagbunggo sa iya ni Distrito sa vice mayoralty elections.
Kahapon nagfile man sang iya certificate of candidacy si Atty. Ed Padios bilang independent candidate sa pagkakonsehal sa Bacolod.
Ginapaabot na sang pamunuan sang Comelec – Bacolod nga mas masako ang masunod nga inadlaw para sa filing of COC sang mga kandidato pero liwat sila nga nagapahanumdum nga napat ipaiway ang mga gimik kag iban pa nga aktibidad nga sarang dagsaon sang tawo sa sulod kag gwa sang Comelec compound ilabi na karon nga may pandemic.