Tuyo ni 6th District Congresswoman Mercedes “Chedeng” Alvarez nga mag pa re-elect sa 2025. Bukas man siya kun sin-o ang iya nga mangin kasumpong sa ginapaabot nga piniliay.
Ini sa tunga sang pahayag ni Atty Jesus Hinlo ang Provincial Council President sang PDP nga may tuyo si anay Hinoba-an Mayor Ernesto Estrao sa pagpapili bilang Congressman sa 6th District. Sa karon suno kay Estrao siya ang naga patigayon pa sang consultation sa amo nga plano. Suno kay Alvarez, kun mag desisyon man ang PDP nga maga field sang kandidato kontra sa iya wala naman siya sang may mahimo pa. Nangin maayo suno sa iya ang iya nga pag trabaho kag relasyon sa iya mga kaupod sa kongreso kag bisan pa sa senado nga katapo sang PDP. Dugang pa niya sang tion sang Duterte Administration siya ang nangin supportive. Si anay presidente Duterte sa karon ang chairman sang PDP.
“I don’t know if they decide nga mag field a candidate against me waay man ko guro may mahimo sina. Anybody can run. I have worked with PDP before, kadamo da sang mga friends ko congress kag senators”, suno kay Alvarez.
Tuman pa man ka temprano para mag-istorya para sa eleksyon suno sa iya. Ang luyag niya tutukan karon amo ang iya trabaho para sa distrito. Nalakip man sa iya nga ginapaabot ang pag lagda sang Presidente sang NIR Bill nga mangin laye, kun sa diin isa siya sa mga nag lobby sini kasubong man ang pag pabutang sang satellite offices sang mga national government agency sa distrito. Yara karon sa first term si Alvarez. Sang 2010 nagserbe man siya bilang congresswoman kag natapos ang tatlo ka termino.