Nagapati si Bacolod Lone District Congressman Albee Benitez nga may politika sa likod sang kaso nga ginpasaka batok sa iya sa Ombudsman may kaangtanan sa demolition sang Old City Hall sa Araneta-Luzuriaga Street.
Ang reklamo nga gin-file ni anay city executive assistant on Market Operations, Ernesto Pineda, nagalakip sang paglapas sa Anti-Graft and Corrupt Practices Act, Technical Malversation, paglapas sa Government Procurement Reform Act kag sa National Cultural Heritage Act of 2009.
Magluwas kay Benitez, upod sa ginpasakaan sang kaso ang walo pa ka mga konsehal kag anay konsehal, lakip sanday Vice Mayor Kalaw Puentevella; councilors Jude Thaddeus Sayson, Israel Salanga, Em Ang, Al Victor Espino, Celia Flor, Pao Sy kag si anay councilors Vladimir Gonzalez, Simple Distrito kag contractor nga si Elwin Javelosa Jr., presidente kag general manager sang ESJ and Sons Construction and Construction Supply.
Ginpahayag ni Benitez nga nag-agi sa insakto nga proseso ang pagpakay-o sang building kag wala sila sang ginatago. Ginpasiguro niya nga transparent ang iya administrasyon sa paggamit sang pondo.
Apang suno sa iya, kabahin ini sang kultura sang politika sa Bacolod City. Ang tagreklamo ang kilala nga kaalyado sang ya kontra sa pulitika.
Sa karon, wala pa sila sang nabaton nga kopya sang reklamo.*