Nagpadala sang sulat ang Presidente sang COVID Warriors of Negros ng si Atty. Pinky Mirano-Ocampo sa Barangay Mandalagan nga naga pahibalo kun tani nga ma set up sila sang community pantry sa bwas nga adlaw sa Fast West gas station ugaling kaina ginpahibalo sila sang barangay secretary nga indi pwede kay kinahanglan pa nila magkuha sang permit gikan sa siudad sang Bacolod.
Suno kay Ocampo, magluwas sa Barangay Mandalagan, may anum pa gid ka mga areas kun sa diin sila maga set up sang community pantry kag sa sini nga mga lugar positibo ang pagbaton sa ila sang mga barangay kag pati na sang PNP kag luyag pa sang iban nga mag donate sang goods.
Gani ginka kibot nila ang nangin sabat sang Barangay Mandalagan.
Dugang pa ni Ocampo nadesisyonan nila nga ang gintalana nga mga goods para sa Mandalagan ang ila na lang idugang sa iban nga mga areas.
Bwas, 1pm, mabukas ang ila nga mga community pantry sa Total Gas Station sa Gatuslao Street, Fast West Gas Station sa Mansilingan, Bacolod Chamber Fire Station, Las Villas, Villamonte Gym kag sa 13th Aguinaldo Street.
Ang COVID Warriors of Negros ang isa ka non profit organization nga nag sugod sa pag hatag sang pagkaon sa mga frontliners sa pag sugod sang lockdown sang nagligad nga tuig kag subong ayuda naman para sa mga pumuluyo ang ila nga ipang hatag.