Sa karon, wala pa sang may nakit-an nga basehan ang Commission on Elections sa pag recommend sa pag paidalom sang Moises Padilla sa Comelec control.
Paathag ni acting elections supervisor, Roberto Salazar, pila sa mga basehan sang pag paidalom sang isa ka banwa ukon siudad sa Comelec control amo nga kun may petition nga na file,
Ayhan may reports gikan sa mga field personnel nga naga duso sang amo nga lihok.
Subject naman sa validation ini. Dugang pa ni Salazar, mismo ang chairman sang Comelec En Banc ang maka desisyon man nga ipaidalom ang isa ka lugar sa Comelec control.
Sang 2019, gin paidalom sa Comelec control ang Moises Padilla kag karon napaidalom sa red category.
Ang banwa sang Candoni, Calatrava kag Escalante ang yara man sa red category.
Samtang, wala naman sang dapat kabalak-an bahin sa seguridad sa mga lugar nga may naga katabo nga engkwentro.
Suno kay Salazar napasalig na sila damlag pa sang Regional Joint Peace Security Coordinating Council nga under control ang naga katabo kag ang kasubong nga mga engkwentro kabahin sang internal security operations.
Sang kahapon lamang may isa ka katapo sang rebeldeng grupo ang napatay sa engkwentro sa Cauayan nga nalakip naman sa orange category sang Comelec.