Commission on Elections ang naga agda sa publiko nga luyag mag pa rehistro nga magpadulong bwas, Pebrero 23, sa Registration Fair sini sa SM City sa Bacolod.
Las 9 sang aga tubtob las 5 sang hapon ang registration fair sa third floor sa North Wing. Suno kay Comelec – Negros Occidental Supervisor, Ian Lee Ananoria, ini na ang higayon sang mga yara naga eskwela sa Bacolod ukon naga trabaho pero taga iban nga banwa kag siudad, nga maka pa rehistro kay mismo ang mga election officer yara sa registration fair.
Kun ipaanggid sa Register Anywhere Program ukon RAP mas madasig ini bangud direkta na mismo sa talatapan sang natungdan nga election office.
Magluwas sa registration fair may voter’s education man nga sakdagon ang COMELEC sa activity center sa ground floor sa north wing sang SM City. Samtang, naga paandam man ang COMELEC sa mga double registrants. Istriktro ang COMELEC sa amo nga offense. Suno kay Ananoria maga pasaka sang kaso ang COMELEC sa mga madakpan.