Shadow

Comelec election officer nagpaathag nga kalabanan sa mga nagpa rehistro sa USLS mga taga Bacolod

Tatlo ka adlaw nga nagpulaw-bugtaw ang dise otso anyos nga si Ethan James Sarmiento sang Barangay Mansilingan sa Bacolod antes niya natapos ang pagpa-rehistro sa Comelec voters’ registration sa USLS sang Huwebes.

Ang masubo kay nagpauli siya nga nagaman-ol ang natuo nga kamot matapos nga ginlungi sang isa ka lalaki samtang sila ang naga-das-okanay sa pila sa gwa sang USLS coliseum.

Nalagyo ang wala makilal-an nga persona.

Suno kay Atty. Kathrina Trinio-Cana, election officer sang Comelec-Bacolod, ang masami mga kinagamo sa last day sang voters’ registration ang isa sa ila luyag kuntani mapaiway amo nga sa paghatag man sang extension sa schedule sang voters registration, nagalaum siya nga temprano pa nga magpadulong sa mga registration sites ang mga voter applicants.

Nagsulat na ang Comelec sa pamunuan sang USLS agud nga mapadayon didto ang voters registration sumugod sa Oktubre 11 tubtob 30.

Ginsiling man ni Cana nga kun basehan ang ila record, kadam-an sa dos mil ka mga nagparehistro sa 3-day registration sa USLS ang taga-Bacolod.

Ang masobra sa kwatro shientos nga nag-transfer sang ila registration sa Bacolod mga yadtong nagpinauli sa siudad sang nagsugod ang pandemic sang 2020.

Dugang diri ang pila pa ka mga botante halin sa out-of town nga luyag man magsaylo agud makaboto sa Bacolod.

Nagapati man si Cana nga indi ang ginapatuman nga voters registration ang rason nga nagsaka ang Covid- 19 cases sa siudad.

Taliw-as ini sa nangin pahayag sang pamunuan sang Bacolod Emergency Operations Center nga isa ka superspreader event ang registration nga ginadagsa sang tawo kag isa ini sa mga rason nga nag damo ang Covid cases sa Bacolod.

Leave a Reply

Your email address will not be published. Required fields are marked *

Secured By miniOrangeSecured By miniOrange