Adlaw adlaw malawig ang pila sa Comelec Bacolod nga nagsugod humalin pa sang nagliligad nga semana.
Si Joel Mahilum, las cinco y media kaina sang aga nagpila na.
Maga pa rehistro siya kay na-erase na ang iya nga ngalan sa listahan suno sa iya.
Suno sa action officer sang TF Disiplina nga si Wilfredo Geolingo, las 4:30 pa lang sang aga may mga nagapila na. Labi nila nga gina tutukan suno sa iya ang Comelec para malikawan ang ano man nga pagdaguso ilabi na nga ginahugtan ang pagpatuman subong sang minimum health protcols sa tunga sang pagpanghangkat sang Covid-19.
Gin markahan na ang dalan kun sa diin ang pumuluyo ang naga pila. Gin butangan naman sang baral. Gina pasiguro nga indi man maga daguso ang maga garantiya ukon guarantor sang mga voter’s registration applicants. Ginbutangang man sang lain nga pila ang mga sa priority kasubong sang senior citizens.
Suno kay Atty Kathrina Trinio Cana ang elections officer sang Bacolod sumugod subong nga semana sandig sa abiso sang national office, Lunes tubtob Biernes na maga bukas ang Comelec sa tinutuyo nga ma accomodate ang pagdamo sang naga pa rehistro kag naga apply sang transfer of registration. Sa Setyembre 30 ini maga tapos. Sadto anay may isa ka adlaw nga ginpain para sa disinfection sa kada semana.
Suguran naman ang pagpatuman sang sattelite registration.
Sa datus sang Comelec, kadam-an sa mga nagpadulong sa ila nga talatapan humalin sang enero tubtob karon mga new registrants kun ipanggid sa mga nag apply para sa transfer of registration.
150 sa mga walk-in ang gina accomodate, 50 naman ang sa nag process online kag ang mga yara sa priority kasubong sang senior citizen, nagabusong ukon may disability ang gina accomodate.