May pila na ka mga commercial establishment sa dalan Lacson ang nangakas sang oversized campaign material sang una nga gin-agyan sang katapo sang Task Force Baklas.
Pero nagapabilin gihapon ang pila ka mga billboard sang mga national candidates bisan nakapadala sang notices sa ila ang Commission on Elections.
Suno kay Atty. Revo Sorbito, acting Comelec officer sang Comelec-Bacolod, bisan may seminar sila upod sa mga electoral board, magapadayon sila sa Operation Baklas.
Gina-abi abi man nila ang pagpasaka sang kaso sa tion nga masugdan na ang pagkakas sang mga billboard nga ginadumilian sa idalom sang Fair Elections Act.
May pila na ka mga election lawyers ang naghinyo sa Comelec nga i-suspend man ang pagpatuman sang Comelec Resolution 10730 nga naga regulate kag naga hatag authority sa katapo sang Comelec nga mangakas kag mag-confiscate sang campaign materials nga wala sa designated common poster areas kag oversized bisan ang yara sa private property.
Handa man ang Comelec local office nga tumanon ang ano man ang mangin rekomendasyon sang main office angut diri.