Ginatutukan sa karon sang Negros Occidental ang coffee production sang probinsya.
Kabahin sa commodity development, gin sakdag ang inventory sa kadutaan nga gina tamnan sang kape kag ang ma produce.
Suno kay Provincial Administrator Rayfrando Diaz, 90 metric tons kuntani ang ginakabig pinakamaayo nga ma harvest sa kada tuig. May 8,000 hectares ang gina tamnan sang kape sa probinsya.
Pero sa karon, 8 metric tons lamang ukon wala gani nakalabot sa 10 percent ang tigayon nga ma harvest. Isa sa tikang nga gina tun-an amo ang pag rejuvenate sang amo nga mga area. May yara man sang plano nga mag tanom sang bag-o, kag sang mas maayo nga variety kag ang ginatutukan karon amo ang robusta.
Suno kay Diaz ini ang gina lantaw nga mangin trademark sang Negros coffee.
Ang branding sini ang gina tun-an man. Gina paabot ang 16 million pesos nga pondo para sa amo nga commodity development gikan sa Office of the Provincial Agriculturist nga kuhaon naman gikan sa 20 percent Development Fund.
Pero, suno kay Diaz luyag man anay nila nga padalman pa gid, bangud may mga coffee plantation nga yara sa protected areas kag indi na productive, rason nga kinahanglan sang pruning.
Pero indi man madali-dali patuman bangud nga yara sa protected zone.
Basi mahimo nga mas mangin maayo kun yara na lamang ini sa marginal lands nga wala ginagamit.
“Let’s strategize, let’s rethink, what to do, so that 90MT nga yield maigo naton in the next 3 years”, suno kay Diaz.