Ginapaabot nga matapos sa sulod sang sini nga semana ang clearing operation sa Reclamation Area nga natalana bilang impounding area sang Bacolod Traffic and Transportation Management Department ukon BTTMD.
Nagapadayon ang paglimpyo sang bag-o nga impounding area suno kay Engr. Loben Ceballos, ang pamuno sang City Engineer’s Office. Ginpahayag niya nga bisan pa nga nasuguran na ini sang nagligad nga tuig, nautod ang operasyon bangud sang sunod-sunod nga mga bagyo nga nagdala sang nagkalain-lain nga mga butang lakip na ang mga dalagko nga kahoy.
Dugang pa ni Ceballos, kinahanglan liwat nga limpyuhan ang area agud mangin handa ini para sa ginaplano nga proyekto sang siudad. Iya man ginsiling nga na identify na ang duta nga may kadakuon nga mga 3,000 square meters nga pagagamiton sang BTTMD, kag ginakabig ini nga isa sa mga prayoridad sang Bacolod City Government.
Ang kabug-usan nga propiedad sang Bacolod City Government sa Reclamation Area nagalab-ot sa masobra walo ka ektarya, nga ginatan-aw nga pagagamiton para sa nagkalain-lain nga proyekto sang siudad sa palaabuton.*