Ginsugdan na sang banwa sang La Castellana ang pre-emptive evacuation sakop sang 6 kilometer danger zone.
Sa video nga kuha sa Biak na Bato makit-an ang pag supervise sa pag evacuate sa mga pumuluyo nga nag bitbit kag nagkarga sang tagsa nila ka mga kinahanglanon nga pagkabutang.
Suno kay Mayor Rhummyla Nicor Mangilimutan ang pre-emptive evacuation ginpatuman bangud man sang advise sang kahapon pa sang Office of the Civil Defense dala sang activity sang Bulkan Kanlaon.
Ugaling tungod man sang mabunok nga ulan dala sang mas ginpabaskog nga southwest monsoon tuga sang Bagyo Bebinca, suno sa alkalde nadugangang pa gid ang ila nga gin-evacuate.
Sa interview sang media kay Negros Occidental Governor Eugenio Jose Lacson, gin-suggest sang OCD 6 nga ang mga banwa kag siudad nga may mga barangay ukon area nga nasakpan sang 6 kilometer danger zone sang bulkan Kanlaon ang dapat mag patuman na sang pre-emptive evacuation.
Suno kay Lacson, La Castellana pa lamang ang naka patuman. Ini ang iga patuhoy pa ni Lacson sa mga alkalde sang La Carlota City, Bago City kag San Carlos City nga may mga barangay nga nadala sa 6km danger zone.
Ang OCD 6 nagsapol na kay La Carlota Mayor Rex Jalandoon angut sa sitwasyon sang bulkan Kanlaon.
Handa na ang probinsya sa paghatag sang assistance sa sini nga mga LGU kun kinahanglanon labi na nga may mga LGU nga damlag pa may evacuees na nga gintatap kag apektado na ang ila nga pondo.
Sa September 13 nga advisory sang PHIVOLCS may 17 ka volcanic earthquakes ang na record sang bulkan.