Clearing operation sa pila pa ka mga dalan lakip na Banago Port sa Bacolod tagaan atensyon sang siudad.
Hilway na ang dalan Lopez Jaena sa mga motorista matapos nga ginpatuman sang Biyernes sang City Legal Office Enforcement Team ang clearing operation batuk sa mga furniture shop nga liwat nga nanglaksam sang dalan kag sidewalk.
Kabahin ini sang luyag matagaan atensyon sang katapo sang business sector.
Nalakip na diri ang nagakitid na nga alagyan pakadto sa Banago Port.
Ginpahayag ni Metro Bacolod Chamber of Commerce and Industry President Atty. Juliana Carbon nga nagakaangay kuntani nga mahawagan ang alagyan pakadto sa sea port bangud naga-serbe ini nga gateway sang siudad.
Gintugyan na ni Mayor Greg Gasataya ang amo nga reklamo sa City Legal Office enforcement team para gilayon nga matagaan aksyon.
Ginsiling ni enforcement team leader retired Police Colonel Levy Pangue nga madasun sila nga magapatuman sang inspection sang Banago Port kag sa iban pa nga mga dalanon nga masami nagahatag kabudlayan sa mga motorista.
Sang nagligad lang nga semana sang una nga ginhawanan sang siudad ang Palanca Street batuk sa mga naga-park nga salakyan kag mga talyer nga nag-okupar sang kilid sang dalan.
Ginapasalig ni Pangue nga regular nga magapatuman sila sang clearing operation upod sa katapo sang Bacolod Traffic and Transportation Management Department para masiguro nga hilway nga maagyan sang mga motorista ang mga dalanon sa siudad.