Personal nga nagbisita kaina sang aga si Governor Eugenio Jose Lacson sa banwa sang La Castellana kag La Carlota City sa pag pat-od sang sitwasyon sang mga apektado sa lugar dala sang paglupok sang bulkan Kanlaon.
Mga evacuees sa banwa sang La Castellana kag La Carlota ang nagapabilin sa gihapon sa mga evacuation center.
Suno sa gobernador naga hulat sang clearance gikan man sa Phivolcs antes pa man matugutan nga maka pauli sang mga evacuees sa ila nga mga puluy-an.
Suno kay La Castellana Mayor Rhummyla Nicor-Mangilimutan, 232 ka pamilya ukon 978 ka individuals ang yara sa ila nga evacuation center.
Anum ka mga upland barangay sa La Castellana suno kay Nicor-Mangilimutan ang direkta nga apektado sang paglupok sang bulkan siyam naman ang apektado sang ashfall. Indi pa mapat-od kun ano ka lapad sa mga talamnan ang apektado sang ashfall.
Nagpadulong man ang gobernador sa La Carlota City. 64 ka pamilya ang apektado ukon 256 ka individuals. Suno kay Angie Gelongo ang CSWDO head, sa mga evacuees wala pa sang may nakapauli.
Sa Barangay Araal kag Yubo mas nagbaskog ang baho sang asupre suno sa iya. Sa iya nga pagbisita luyag man ipasiguro sang gobernador nga ang relief assistance sang probinsya ang nag-abot sa mga apektado nga lugar kaangay sang food packs, tubig kag bulong.
“Those that moved to the evacuation center have been told to remain in the center until such time that the alert level 2 will be downgraded. The local government unit (of La Castellana) is just depending on the advise of Phivolcs with regards to the status of Mt Kanlaon”, suno kay Lacson.
Mga evacuees sa Bago, Pontevedra kag Moises Padilla ang nakapauli na.