Bacolod City Legal Office nakig sugilanon na sa property owner para sa himuon nga demolisyon sang overflow nga nagasablag sa Kabiguan Creek sa Barangay Pahanocoy nga amo ang gina tudlo nga ginahalinan sang pagbaha.
Sa video ni John Ray Tragico makita nga hunas ang Sum-ag River samtang ang naga-angut nga Kabiguan Creek ang taga lumapaw na ang tubig tungod sang magamay nga overflow nga nagasablag sa alagyan sang tubig.
Sa ginpatigayon nga inspection sang katapo sang City Legal Office kag City Engineer’s Office kahapon, nakita nga ang overflow nga ginakabig illegal structure ang kabangdanan sang pagbaha sa mga kaiping nga purok nga nasakpan sang Barangay Pahanocoy sa pagbunok sang ulan.
Pila ka mga motorista ang inoras nga na-stranded, pati na ang mga ambulansya nga naguot sa Araneta highway tungod sang baha.
Ginpahayag ni City Legal Officer Romeo Carlos Ting, Jr., nga nagsugot na ang property owner nga ipakakas ang overflow nga naga-sablag sa Kabiguan Creek.
Sa pagsinapol ila istoryahan kun sin-o ang magapa-demolish sang illegal structure kag maga-construct sang temporary nga taytay nga maagyan sang mga pumuluyo.
Samtang, ang Department of Public Works and Highways ang magatalana sang P25M para sa drainage construction project sa Bangga Tomaro kag Bangga Aning agud maka pahagan-hagan sang malawig na nga pagbaha nga naga-apekto sa Barangay Pahanocoy kag Sum-ag sa Bacolod.