Nag submit na sang paathag si BTAO head Patrick Lacson sa gin issue nga notice to explain sang City Legal Office angut sa pagkakas sang logo sticker sa MABB Cab unit nga nakuhaan litrato nga nagapark sa gwa sang iya puluy an.
Ginpahayag ni City Legal Officer Atty. Romeo Carlos Ting, Jr. , hulaton nila ang isa masunod nga sabat ni Lacson sa ikaduha nga notice to explain angut naman sa gin-issue nga memo nga nagahatag sang quota sa mga traffic enforcers nga manakop sang indi magnubo lima ka mga traffic violators kada adlaw.
Ini antes pa sang patigayunon nga evaluation nga mangin basehan sang iga submit nga rekomendasyon kay Mayor Albee Benitez.
Gindugang ni Ting nga yara sa alkalde ang desisyon sa pagkakas ukon pagpabilin kay Lacson sa posisyon sa pihak sang sunod-sunod nga insidente.
Dismayado si Mayor Albee sa sunod-sunod nga issuance sang notice to explain batuk sa iya.
Gin-ako ni Lacson ang iya nahimo. Iya na gisiling nga may yara sang miscommunication sa pag gamit niya sang MABB Cab unit nga iya gina usar sa pag monitor sang traffic personnel.
Sa gin-nullify ukon na withdraw na nga memo sang alkalde, gin paathag ni Lacson nga iya lang gin-anggid ang paghatag sang quota sa mga traffic personnel sa sistema sang iban nga pungsod sa abroad para mapabaskog kuntani ang kampanya batuk sa illegal parking kag iban pa nga traffic guidelines.