Nagsugod na ang Commission on Human Rights sang ila nga moto proprio investigation sa Himamaylan Massacre.
Suno kay Vincent Parra ang pamuno sang CHR sa probinsya, Biyernes pa sila nagsugod kag naghinyo na sila sang mga dokumento halin sa initial investigation report padulong sa crime scene documentation gikan sa Himamaylan PNP.
Napat-od naman nila nga gikan sa Carol-an sa Kabankalan City si Emilda Fausto ang asawa nga ginpatay kag sa Tayasan sa Negros Oriental naman ang bana nga si Rolly.
Magapadulong sa Carol-an si Parra para mag pangusisa pa gid. Sa Hwebes tuyo man nila nga istoryahon ang nakaluwas nga anak.
Nakabaton sila sang impormasyon nga na red tag ang pamilya kag ini ang luyag nila nga padalman.
“May mga information man nga naga siling nga daw kaagi sila red tag, nga pamilya. Human rights issue na ang red tagging. Ma dig deeper kami da sa red tagging issue. Makadto kami sa Barangay Carol-an,
at the same time kadtuan man namon ang bata niya nga nag report nga babaye”, suno kay Parra.
May impormasyon man nga naga serbe informant sang militar ang bana.
“Daw may press release man ang militar nga military informant siya (Rolly) bale sya ang ga facilitate kuno mag surrender sa iban nga rebelde, which is probably nga daw amo na gintira siya”, suno kay Parra.
Sa kasubong nga mga kaso may 100 days nga gina hatag para maka submit sila sang report sa regional office.
Ang CHR ang naga hatag man sang assistance sang pamilya sang nahul-an, kag sa kasubong nga kaso, 50,000 pesos ang balor sang assistance.