Nakalab-ot na sa Comission on Human Rights ang video nga gin post sang Silay City PNP kun sa diin ila gin pa parada sa dalan nga naga arms forward ang mga violators nga wala naga suksok sang face mask.
Suno sa Commission on Human Rigjhts national office, ila ipa usisa sa CHR region 6 ang pag parada sa mga violators nga ila ginakabig nga indi maka tawo nga penalidad.
Damlag pa ginpahayag sang hepe sang Silay PNP nga si Major Rollie Pondevilla ila regular nga gina pa parada humalin sa police station padulong sa plaza covered court ang mga violators bangud indi man sila pwede mag tingub sa police station ukon masakay nga tingub sa patrol car bangud indi masunod ang physical distancing.
Ila gina pa arms forward ang mga violators agud mapabilin ang physical distancing kag sila ang gina pakadto sa covered court kun sa diin sila naman ang gina paatubang sa lungon bilang pag pahanumdom sa ila kun ano ka importante ang pag sunod sa mga health protocols sang siudad.
Mismo si Silay City Mayor Mark Golez ang nag depensa man sa kay Pondevilla kag iya gin siling nga walo na ini ka bulan nga gina himo sang kapulisan sa siudad agud ma disipilina man ang mga pumuluyo.
Kalabanan man abi suno kay Golez nga mga naga lapas sang ordinansa ang indi makasarang mag bayad sang multa gani imbes pabayaron ukon kasuhan, ila na lang gina disiplina ang mga pasaway nga residente.
Ang Negros Occidental Police Provincial Office nag siling man nga wala pa sila sang may nabaton nga report nga naga reklamo sa gina ubra sang Silay PNP sa mga violators.
Pero suno kay NOCPPO PIO Lieutenant Abegael Donasco, ila man nga usisaon kun bala may gina lapas gid man ang Silay PNP sa tawhanon nga kinamatarong sang mga naga violate nga mga residente.