Indi na kinahanglan pa nga tawgan ang nagkalain-lain nga numero sang tagsa ka ahensya, bangud sa karun isa na lang ka numero ang sarang nga matawagan agud mapadangat ang mga concerns sa Bacolod LGU.
Opisyal na nga ginlunsar sang siudad sa publiko ang isa ka centralized nga hotline ukon ang 034-479-6100.
Ginsiling ni Bacolod City Mayor Greg Gasataya nga ini na nga hotline ang magasabat sa mga concerns sang publiko lakip na ang mga reklamo sa basura, traffic, social pensions, mga financial assistance kag iban pa.
Sa karun may napulo na ka trained personnel nga gin-assign ang siudad agud magsabat sa mga tawag kag bukas man ini nga madugangan kun magdamo na ang mga calls.
Lunes tubtob Domingo, kada las 6 sang aga tubtob las 11 sang gab-i, bukas ang ini nga centralized hotline.
Dugang ni Gasataya, kun makatawag na ang isa ka caller may angut sa iya nga concern sa siudad, pagahatagan ini sang reference number kag sarang na sang caller ma track ang update sang iya nga concern paagi sa isa ka website.
Kadungan sini, ginkumpirmar man ni Gasataya nga operational naman 24/7 ang localized 911 para sa mga emerhensya sa siudad.
[sibwp_form id=1]