Central Negros Electric Cooperative ang nagpaathag sang pila ka mga insidente sang brownout nga nagluntad sini nga semana.
Madamo nga mga netizens ang nagareklamo sa social media sa asud-asud nga brownout nga nagakatabo sa isa ka adlaw magluwas sa malawig nga scheduled brownouts kun weekend.
Ginpahayag sang OIC general manager sang Ceneco nga si Atty. Danny Pondevilla nga indi tanan nga kabangdanan sang brownout ang yara sa ila area of coverage.
Suno sa iya, kun ang source sang brownout ang yara sa 69-KV transmission line, iya ini sang National Grid Corporation of the Philippines ukon NGCP kag wala ini sang may mahimo ang Ceneco.
Pero may pila naman ka mga brownouts sa distribution line mismo sang ceneco nga kalabanan tuga sang pag clearing sang mga linya sang kuryente.
Gilayon naman ini nga ginakay-o sang ila service crew agud nga mabalik ang connection sa madasig nga tini-on.
Gindugang pa ni pondevilla nga tuyo niya nga I-review ang outsourcing contract sang mga nagapatigayon sang clearing operations sa bahin sang Ceneco kun ano ang sarang mahimo kun magpadayon ang brownouts tuga sang nagakasalapay nga kuryente.
“So lantawon ta, reviewhun ta naman ang mga parameters kun paano ang accomplishment sang sini nga mga contractor nga gin hire para ya sa clearing sang linya kun nano ang performance sini prior sa payments based sa ila contract kun nano ang mga parameters sini kay nagliligad kalabanan nga cause is more on sining clearing sa linya,” suno kay Pondevilla.