Sa press conference nga ginpatigayon sang Central Negros Electric Cooperative gin eksplikar sang management kag katapo sang Board of Directors ang mga rason sa mga unscheduled brownouts humalin sang nagligad nga bulan kag ang pagsaka sang bilL sa kuryente.
Ginsiling ni Acting General Manager Leo Van Ticar nga ang epekto sang pandemic, pagsaka sang bili sang produkto petrolyo tuga sang away sa tunga sang Russia kag Ukraine ang pila lang sa mga kabangdanan nga naka apekto man member consumers sang Ceneco. Pero iya ginklaro nga wala sang irigularidad sa ila nga kontrata sa mga power suppliers.
Ginsaysay man nila kun ngaa nag emergency purchase ang power utility sang 20 megawatt power supply sa Palm Concepcion Power Corporation.
Pati ang problema may kaangtanan sa hotline numbers gintagaan man nila sang kasanagan kun ngaa indi ini matawgan sang mga kunsomedor kun may brownout.
Natagaan man sang higayon si Wennie Sancho, convenor sang Power Watch Negros nga magpamangkot sa management kag board. Ginkondenar niya man ang P20megawatt power supply contract sang Ceneco kag PCPC.
Pero wala napaiway ang tensyon sa tunga niya kag ni Ceneco Board of Director Eugene Velasco nga amo ang nag-alegar nga naga forum-shopping ang consumer watch group pinaagi sa pagpalab ot sang reklamo sa national government.
Ginpahayag naman sang pamunuan sang Ceneco nga handa sila nga atubangon ang mga reklamu batuk sa ila. Nagpasalig man sila nga improve pa gid ang ila pagserbisyo agud mapunggan ang ginaduso nga privitization nga amo ang para sa ila makatuga sang dako nga disbentaha sa mga member consumers.