Nakuhaan sang video sang isa ka residente sang Barangay Felisa siudad sang Bacolod ang aktwal nga pag-ula sang basura sa cell number 5 sang Sanitary Landfill, bisan wala pa sang abiso gikan sa siudad nga ginagamit na ini.
Miyerkules sang aga, gilayon man nga ginkumpirmar ni City Administrator Atty. Mark Steven Mayo nga nagaserbe man bilang Officer-in-Charge sang Bacolod Environment and Natural Resources Office ukon BENRO nga sang Hulyo 30, ila na gindesisyonan nga gamiton ang amo nga cell sa Sanitary Landfill.
Suno kay Mayo, nagpabalo na sila sa Environmental Management Bureau Negros Island Region, apang wala pa ini makasabat sa siudad.
Apesar nga wala pa sang pormal nga permiso gikan sa EMB-NIR, nag desisyon na ang siudad nga gamiton ini bangud naga-awas na ang cell number 4 kag indi na ini sarang pa mahabuyan sang basura.
Gin-ako man niya nga wala pa sang Environment Compliance Certificate kag Notice To Proceed ang cell number 5, bangud indi pa ini ma sugudan proseso kay wala paman sang ECC ang cell number 4.
Indi na makahulat pa ang siudad nga makuhaan anay sang ECC ang cell number 5 suno kay Mayo bangud delikado na ang kahimtangan sang cell number 4, kay ginapalabi sang siudad ang ikaayo sang pumuluyo.
Tatlo ka ektariya ang kalaparon sang cell number 5 kag ginapaabot ini nga mangin operational sa sulod sang duha tubtob tatlo ka tuig.
Sa Agosto 20, magapatigayon sang isa ka public hearing ang EMB-NIR agud maklarohan ang publiko may angut sa kahimtangan sang landfill kag sang ECC sang duha ka cell.
[sibwp_form id=1]