Sarang na maka kuha karon sang computerized IELTS examination sa probinsya.
Ini kasunod sang pag lunsar sang CD-IELTS ukon computer delivered – International English Language Testing System shared laboratory dala sang partnership sang IDP kag sang NOLITC. Ang IELTS exam, isa sa mga requirements sa mga maga migrate, maga eskwela ukon maga trabaho sa mga English speaking countries kasubong sang mga nurse.
Suno kay Governor Eugenio Jose Lacson, Ini ang pinaka una nga shared Lab sa Visayas nga naga tanyag sang CD-IELTS exam.
Suno kay Cristina Orbecido ang Vocation School Administrator sang NOLITC, sa CD-IELTS exam sarang makuha ang test result sa tatlo ka adlaw, nga kun ipaanggid sa IELTS exam on paper, duha ka semana kag makuha ang resulta.
Suno kay Orbecido, ini nga higayon ang bukas indi lamang sa mga Negrense kundi pati man sa kaiping nga mga probinsya sa Western Visayas. Suno kay Jose Miguel Habana ang Country Director sang IDP, karon nga bukas na ang borders nagbalik na ang demand angut sa mga luyag mag gwa sa pungsod. Gina paabot ang 8 to 10 percent increase bahin diri.
Ang IDP nagatanyag sang libre nga test preparation material kag bisan pa webinars para sa mga maga kuha sang IELTS. Ang probinsya naman may free courses nga ginatanyag sa mga nagakinahanglan magkuha sang IELTS. Ang CD-IELTS exam naga bili sang 12,000 pesos. Sa Setyembre 24 ang pinaka una nga CD-IELTS exam.