Banwa sang Cauayan ang may pinaka daku nga danyos sa humayan nga gin-report bangud sang epekto sang El Nino Phenomenon.
Suno kay Mayor John Rey Tabujara, katorse sa ila nga mga barangay ang may kahalitan sa humayan kag 127 naman ka mga mangunguma ang apektado.
Sa report sang Office of the Provincial Agriculturist sang Pebrero 12, nagdangat sa 7.6 million pesos ang balor sang kahalitan.
Ginahulat sang alkalde ang report sang Municipal Agriculturist Office agudt mapat-od man nila kun ano ang igahatag nga bulig sa mga mangunguma.
Ini kun bala alternative livelihood ukon financial assistance. May pondo ang banwa para diri.
Paathag ni Tabujara, rainfed ang kalabanan sa ila nga humayan kag gamay lamang ang may yara sang irigasyon nga sa karon apektado naman bangud sang tuman nga init dala sang El Nino Phenomenon.
“May mga irrigation didto nga may gina pangayo sila nga bulig sa akon, especially sa ila pumps. So ginpalibot ko ang akon Municipal Agriculture Office (MAO) to check kun ano ang mga kinahanglanon. Aside from that meeting ang bilog nga council kun ano abi ma propose sang MAO nga mahatag namon as alternative anay samtang galawig pa gid ang El Nino. Hambal ko sa kay MAO hasta sa akon DRRMO office man nga mag consolidate na kay ang budget namon is ready naman”, suno kay Tabujara.