Maga hatag sang food kag financial assistance ang banwa sang Cauayan sa mangunguma nga ang pananum apektado sang El Nino Phenomenon.
Suno kay Mayor John Rey Tabujara, nag ulan sa nagligad nga duha ka adlaw sa banwa sang Cauayan bagay nga gina abi-abi nila.
Padayon pa ang pag consolidate nila sang ila nga report.
Damlag pa, ginsiling sang alkalde nga gina consider nila ang pag paidalom sa state of calamity sang banwa.
Pero sa karon, ang tikang nga ila ipatuman para mabuligan ang 127 ka mga mangunguma nga apektado sang pagmala sang duta dala sang El Nino phenomenon amo ang pag release sang food assistance gikan sa DSWD kag ang financial assistance nga gikan mismo sa pondo sang banwa.
Suno kay Tabujara, ang kantidad ang maga depende sa mangin recommendation naman sang ila nga Municipal Agriculture Office.
Nagdangat sa masobra 7.6 million pesos ang kahalitan sa mga humayan sa Cauayan.
“Regarding sa state of calamity basi ma consolidate (report) ni namon this week, mahatag lang kami guro anay sang assistance indi lang kami guro anay makahambal gid nga mag state of calamity”, suno kay Tabujara.