Caretaker sang propiedad sang isa ka non government organization patay matapos gintiro sa Brgy. Handumanan sa Bacolod City.
Patay si Henry Salbibia matapos gintiro sang wala pa makilala nga suspek sang kahapon, Lunes nga adlaw.
Suno kay P/Capt. Sherwin Galupar hepe sang Police Station 10, las onse singkwenta sang aga samtang naga sakay sa iya motor gintuparan ini sang isa pa gid ka motor sa may Zone 1 sa Barangay Handumanan.
Gintiro sang naga isahanon nga gunman ang biktima sa ulo nga gintunaan sang iya kamatayon.
Nagapadayon pa ang imbestigasyon sang Police Station 10 sa pagkilala sa suspek.
Ang biktima ang caretaker sang propiedad sang non government organization nga Negros Economic Development Foundation ukon NEDF.
Anay kagawad man siya sa Brgy. Blumentrit, banwa sang Murcia.
Ginpahayag man ni Galupar nga paagi sa CCTV, nakita ang gunman nga nakasuksuk sang helmet kag itom nga jacket.
Nakuha sa crime scene ang isa ka basiyo sang wala pa mahibaluan nga kalibre sang armas.
Sa karon indi pa matumod sang mga kapulisan ang motibo sa pagpatay sa biktima.