Canter ang naka hit-and-run sa mag-asawa sa Binalbagan.
Ang ini nga impormasyon ang nabase sa CCTV footages nga nakuha sang Binalbagan PNP.
Paathag ni Police Major Jun Ray Batadlan hepe sang Binalbagan PNP, puti nga canter nga dropside ang nag-hit and run sa mag-asawa nga negosyante sang isda sa Brgy. San Jose sa Binalbagan sang Pebrero 1.
Dugang pa niya, nakita sa video nga ang canter ang naglabay sa lugar nga natabuan sang bungguanay kun sa diin na hit-and-run ang mag-asawa nga si Joear kag ang iya misis nga si Gilberta.
Ang misis ang napatay sa amo nga insidente.
Dugang pa ni Batadlan, indi klaro ang plate number sang canter sa CCTV footage nagapadayon pa gihapon ang ila backtracking subong man gina-usoy nila ang mga lugar nga may yara sang CCTV agud makabulig sa pagtumod sang driver sang amo nga salakyan.
Madumduman, una nga ginpahayag sang Binalbagan PNP nga pick up ang nag-hit and run sa duha kun sa diin nagresulta sa kamatayon sang asawa samtang pilason ang bana.