Mayor sang Candoni may madamo man nga palamangkutanon angut sa rekomendasyon sang pag paidalom sa iya nga banwa sa orange category sa gina paabot nga piniliay.
Sa interview sang media kay Mayor Ray Ruiz, sa iya nga assessment matawhay man ang sitwasyon sa banwa sang Candoni.
Gani sang ginpahibalo siya sang recommendation sa pag paidalom sa orange category, may mga pamangkot man siya.
Kun ini may kaangtanan sa pag ka patay sang anum ka mga katapo sang rebeldeng NPA sa encounter sadtong November 2024, para sa iya isolated case ang natabo kag wala man sang kaangtanan sa eleksyon.
Pero klaro niya man nga kun amo gid man sini ang rekomendasyon, bukas man siya sa pagbaton sini.
Maayo man gani suno sa iya nga may kasiguraduhan ang seguridad sang banwa.
Gin-recommend sang Provincial Joint Security Control Center ang pag paidalom sa orange category sang banwa bangud sang ginalantaw armed threat.
Pending sa karon ang approval sini sang COMELEC Manila. 31 sa 32 ka mga banwa kag siudad sang Negros Occidental nga naga lakip sang Bacolod City ang yara sa green category ukon mga lugar nga wala sang concern.
“Actually sang gin-inform ko nila nga possible nga mag orange ang Candoni sa sining palaabuton nga election, actually may madamo man ko nga palamangkutanon. Ngaa dapat gid ipaidalom kay so far kita ko daw tawhay man ang sitwasyon sa amon. But okay man lang wala man problema. Kun ipaidalom gid man sa orange category so far wala man gid masyado problema. Mas mayo gani na kay bisan paano may mga ari ta di otoridad sa pag hatag kasiguruhan nga ma maintain ang katawhay kag kalinong sa palaabuton nga election”, suno kay Ruiz.