Nagahilibi-on nga nagpanugid sa katapo sang Police Station 8 ang 19 anyos nga dalaga kahapon.
Ini matapos nga makabaton sang mensahe halin sa nagpakuno-kuno nga foreigner nga namahug ipalapta ang iya mga nude photos kag videos kun indi siya magpakighilawas.
Istorya sang biktima, napilitan siya nga magpadala sang mga litrato kag video sa ka chatmate kabaylo sang P10,000 nga wala niya man nabaton. Nakibot na lang siya sang gin-blackmail na siya sang suspek.
Gani gilayon man nga ginpatuman sang kapulisan ang entrapment operation nga nag-resulta sa pag-aresto sa 27 anyos nga si Dennis James Traza, isa ka empleyado sang call center firm sa Bacolod.
Suno kay Police Major Joery Puerto, commander sang Police Station 8, nakuha nila sa suspek ang cellphone kun diin natago ang mga litrato kag video sang biktima.
Nagpamalibad maghatag sang pahayag ang suspek.
Ginpasakaan na siya sang kaso nga grave threat kag acts of lasciviousness.nagpaandam naman ang kapulisan sa mga posible magpalapta sang litrato kag video sang biktima nga sarang man sila mapasakaan sang kaso angut sa pagsupak sang Cybercrime Prevention Act of 2012.