Naglawig sang masobra 20 minutos ang pagbayluhanay sang lupok sa tunga sang mga katapo sang 94th Infantry Battalion kag New People’s Army sa Sitio Balao, Barangay Tan-awan, syudad sang Kabankalan, Negros Occidental.
Huwebes sang hapon, nakabati ang mga residente sang paglinupok, rason nga sila ang nag evacuate.
Ginsiling ni Col. Erwin Lamzon, spokesperson sang 3rd Infantry Division sang Philippine Army, isa ka CAFGU ang napilasan sa engkwentro matapos makaangkon sang pilas sa iya guya, tuga sang shrapnel.
Dugang pa ni Lamzon nga may na-obserbahan ang tropa sang gobyerno nga isa ka pilason nga rebelde ang ginatuwangan sang tatlo ka mga hangaway sang NPA.
Ang ini nga impormasyon, suno kay Lamzon ang gin-validate sang mga pumuluyo sa lugar.
Sa pihak nga bahin, naghatag ang local government unit sang Kabankalan sang lugar sa Palawis Day Care Center kung diin temporaryo nga magatiner ang mga apektado nga indibidwal sa nagluntad nga engkwentro.
Suno sa Kabankalan LGU, apektado ang 116 ka mga pamilya ukon 460 ka mga indibidwal gikan sa apat ka mga sitio sa Barangay Carol-an, lakip na ang Sitio Balaw, Palawis, Alambihod kag Bulusan.