Sunod-sunod nga lupok sang pusil ang mabatian sa video samtang nagapanago sa kampo ang mga pumuluyo sa Sitio Bautista, Barangay Malasibog sa Escalante City, Martes sang hapon, Setyembre 29.
May pila ka mga estudyante ang papauli na kuntani sa ila balay gikan sa eskwelahan apang naabtan sang lukpanay.
Sa tuman kahadlok, sila ang naghapa kag nagpanago sa katubohan.
Naglawig sang 10 minutos ang pagbayluhanay sang lupok sa tunga sang katapo sang 79th Infantry Battalion kag ginapatihan miyembro sang New People’s Army.
Nagresulta ang engkwentro sa kamatayon sang isa ka CAFGU Active Auxiliary kag pagkasamad sang duha ka mga soldado.
Suno sa report sang Army, nagpatigayon sang security patrol ang katapo sang 79IB upod ang team sang Mobile Community Support and Sustainment Program sang magluntad ang engkwentro.
Nagpasalig si Major General Joey Escanillas, commander sang 3rd Infantry Division nga ila pagahatagan sang suporta ang pamilya sang napatay nga CAFGU.
Samtang, gindala sa ospital kag yara na sa istable nga kondisyon ang duha ka mga pilason nga soldado.
[sibwp_form id=1]