Cadiz City kag banwa sang Hinigaran ang nag abiso sang temporaryo nga pag paiway anay sang pagbaligya kag pag konsumo sang aloy kasunod sang nakita nga allergic reactions sa pila nga nag kaon sini.
Nagtukod na sang composite team ang Cadiz City nga gina tapuan sang PNP, PNP Maritime group, Coast Guard, Bantay Dagat, City Agriculture kag Staff sa fishery regulations agud mausisa ang kaso sang mga persona nga nakitaan sang allergic reactions kasunod sang gin-report pagkaon nila sang gina alegar nag pasar na nga aloy. Suno kay Dr Maria Victoria Ibanez, 56 ang nag pa consulta sa Emergency Clinic kag sa District Hospital. Wala pa nalakip ang mga nag self medicate.
Suno kay Cadiz Mayor Salvador Escalante Jr., pila sa ila ang nag palanuka, may kabudlayan sa pag ginhawa, nag palamula, nag palang habal kag paglingin sa ulo matapos nga mag kaon sang aloy sang Lunes. Nadapatan na sila sang mga bulong, pero ang duha ang na admit sa Cadiz District Hospital.
Sa inisyal nga pag pangusisa nag gikan sa Iloilo kag gin deliver sa Negros sang Sabado ang isda nga aloy nga nakuha Miyerkules pa nga adlaw.
Ang una nga batch nga nabaligya sang Domingo wala sang problema, ang nabaligya sang Lunes suno kay Escalante amo ang nag ka problema matapos nag tuga sang allergic reactions sa mga nakakaon sini. Gina pat-od kun diin gid nag gikan ang supply suno kay Escalante.
“Ang bottomline sini is we will cure ang apektado at the same time review the process. Kay kun may deperensya I correct naton, I improve naton ang proseso. Kun istrikto, istrikto dapat, kay isda, pagkaon gina baligya mo. Istrikto na di”, suno kay Escalante.
Sa Hinigaran naman suno kay Mayor Mary Grace Arceo, tatlo ang nakitaan sang allergic reaction matapos mag kaon man sang aloy sa Brgy Tugbungan sang Lunes. Duha sa ila ang taga Himamaylan kag nakapauli na ang taga Hinigaran suno kay Arceo ang na admit sa Hinigaran Medical Clinic. Indi pa mapat-od kun diin nag gikan ang aloy, kun bala gin deliver lamang ini sa Hinigaran ukon mismo gikan man sa Hinigaran.
“Ang natabo nag kaon na sila sang napasar na bala nga aloy. Nagpin-ot ang ila dughan, nag lain ila pamatyag, gindala sa amon medical clinic. Subong under observation sila”, suno kay Arceo.
Maid-id man sa karon nga gina monitor sang Bureau of Fisheries and Aquatic Resources NIR ang insidente sa Cadiz. Padayon man ang pag pangusisa sang ila nga technical team kag base sa preliminary reports suno sa BFAR ang mga sintoma nga nakita consistent sa Scombroid Fish Poisoning.
Paathag sang BFAR indi ini isa ka naturally occuring toxin sa isda mismo kundi nagakatabo kun indi maayo nga na refrigerate ang isda humalin sang pag kakuha sang isda gikan sa dagat padulong sa merkado. Kun matabo ini, naga produce sang high levels sang histamin ang isda nga indi makuha bisan pa lutuon ini. Gina abisuhan ang publikok nga siguruhon nga preska ang mga ginabakal nga isda.*
[sibwp_form id=1]