Pagdumili sa non-essential traveler sa probinsya sang Iloilo ang ginpatuman sang Philippine Coast Guard. Business group nagapati nga ang dugang nga restrictions sa movement maga resulta sa socio-economic disaster.
Padayon pa ang pagbyahe sang mga fast craft kag roro vessel halin Negros pa Iloilo kag vice versa.
Wala pa man ginpatuman sang Philippine Coast Guard ang sea travel moratorium nga nabase sa executive order ni Iloilo City Mayor Jerry Treñas samtang wala pa sang approval gikan sa Inter-Agency Task Force.
Pero suno kay Commander Edison Diaz, sang PCG-Iloilo ila na ginsugdan ang pagdumili sa mga non-essential traveler nga makatabok sa Iloilo sandig man sa executive order ni Iloilo Governor Arthur Defensor.
Mga APOR, OFW, kag retruning residents lang ang tugutan nga makasulod sa probinsya sang Iloilo halin Hunyo kwatro tubtob dise otso.
Pero ginalantaw sang katapo sang tagdumalahan sang shipping firm kag business sector nga dako ang mangin negatibo nga epekto sini sa ekonomiya ilabi na sa mga negosyo sa Negros kag Bacolod City.
Suno kay Frank Carbon,executive director sang MBCCI, 80 porsyiento sang kwarta nga nagasulod sa probinsya ang gikan sa mga konsumedor ukon bumalakal kag mga remittance. Gani isa ka dako nga kabudlayan ang pagpatuman sang travel restrictions.
Ang sea travel moratorium ang gin ayo sang local government sang Iloilo agud mapahagan hagan ang kaso sang Covid-19. Pero para sa negosyante, indi lockdown kag movement restrictions ang epektibo nga tikang kundi ang strikto nga pagpatuman sang health standard protocol.
“It’s not that easy to stop it because at this point of time wala na kwarta ang small businesses especially ang mga micro businesses kag low income household. It will be a disaster. Yes, after more than a year,wala na,” suno kay Carbon.