Mga vendors sang Burgos Market nagahinyo sa konseho nga matagaan sila sang extension antes suguran ang construction sang bag-o nga merkado. Antes pa man napabutyag ni Mayor Albee Benitez ang plano nga public private partnership project upod sa Pamilya Yanson angut sa construction sang New Burgos Public Market, nagpalayag na sang ila pagkabalaka ang mga market vendors nga sarang maapektuhan kun suguran ang construction sang proyekto.
Sa ila ginpalab-ot nga sulat sa konseho ginapaligban man nila ang posible pagsaka sang renta sa igatukod nga merkado.
Suno kay Councilor Celia Flor, pamuno sang Committee on Markets and Slaughterhouse, nagapadayon ang negosasyon sang alkalde sa Pamilya Yanson agud mapaiway indi na mabudlayan nga magsaylo-saylo ang mga vendors kun ipatuman ang demolition sang daan nga merkado.
Ang 2 ka ektarya nga duta sang Pamilya Yanson ang yara sa kilid lang sang merkado.
Gani kun matigayon man ang posible swapping sang lote sarang mabuhinan ang igasto sang siudad sa construction sang temporary market kag ang pagbayad sang renta sa pamilya Yanson.
Pwede man nga magamit sang siudad ang daan nga merkado bilang bagsakan kag sa iban pa nga expansion project.