On hold sa karon ang P1.1B nga Bulk Water sang probinsya.
Sa interview sang media kay Negros Occidental Governor Eugenio Jose Lacson sang weekend, iya ginsiling nga indi maka padayon ang proyekto kun wala sang approval gikan sa Silay City Government.
Sang Biyernes sa interview kay Silay Mayor Joedith Gallego iya ginsiling nga indi siya pabor sa pag hatag sang Resolution of No Objection ukon RONO para sa bulk water project sang probinsya.
Para kay Gallego ang pagkuha sang tubig gikan sa suba sang Silay para sa bulk water project ang sarang mag butang sa alang-alang sang supply sang tubig sang Silay nga iya gina lantaw maka apekto sang kinahanglanon sang mga pumuluyo kag sang mga mangunguma sa palaabuton.
Suno kay Lacson may 400 million liters a day ukon MLD nga kapasidad ang natungdan nga suba sa Silay, kag ang kuhaon para sa bulk water project 24 to 26 MLD lamang.
Ang tuyo sang Negros Occidental Bulk Water Project amo nga masabat ang kinahanglanon sa kakulang sang matinlo nga tubig sang mga Negrense.
Priority suno sa gobernador ang Silay kun matigayon ang project.
Magluwas sa RONO nga ginahinyo, kinahanglan man suno sa gobernador ang reclassificiation sang isa ka ektarya sang duta sa Guimbalaon nga amo ang pahamtangan sang intake point kag sang treatment facility sang proyekto, kag mismo ang building permit para diri.
Padayon nga naga laum ang probinsya sa isa ka positibo nga outcome pero kun indi gid matigayon mahimo nga indi na madayon ang bulk water project.