Ang Bacolod City Veterinarian naghinyo sang bulig sa Department of Agricultuire kag Bureau of Animal Industry agud mapunggan ang pagpasulod sang ginadumilian nga pork and pork meat products lakip na ang live wild and domestic birds halin pa lang sa mga lugar nga may kaso sang African Swine Fever kag bird flu.
Ang probinsya sang Negros Occidental kag Cebu amo na lamang ang mga area sa Visayas nga nagapabilin nga ASF kag bird flu free suno kay Bacolod City Veterinarian Dr. Agueda De la Torre.
Ugaling sa pihak man sang kampanya sang natukod nga joint Anti African Swine Fever Task Force sang probinsya kag Bacolod, may mga banned pork and pork meat products kasubong sang mga siopao kag iban pa nga pasalubong items nga sa gihapon makuha sang task force sa mga pasahero.
Gani naghinyo na si Agueda sang bulig halin sa pamunuan sang Department of Agriculture – Western Visayas kag sa Bureau of Animal Industry agud mapunggan ang pagdala sang mga ginadumilian nga produkto halin pa lang sa mga puerto sang mga lugar nga may kaso sang ASF kag avian flu.
Nagapati si Agueda nga paagi sa mas mabaskog nga nationwide campaign, mas maamligan ang swine kag poultry industry sa probinsya.
Samtang, ang BAI pinaagi sa DA-Western Visayas ang nag turn-over man sang mobile disinfection unit sa provincial government. Ang disinfection vehicle ang magapabaskog sang kampanya kontra ASF sa mga kabarangayan.