Natukiban nga sadto pang Setyembre 6, 2025 nadula ang marker sang Tindalo Tree nga nahamtang sa Bacolod Public Plaza.
Suno sa mga in-charge sang plaza, wala sila sang ideya kun paano kag sin-o ang nagkuha sang marker. Nahibaluan lang nila ang insidente sang may nag-report nga concerned citizen nga wala na ang dedication plate nga naga-identify sa Tindalo Tree.
Suno sa City Tourism Office, ang insidente gin-refer na sa City Mayor’s Office, kag ang opisyal nga pahayag ang magahalin mismo sa opisina sang alkalde.
Ang marker nagapahanumdom sang Inauguration Day sang Bacolod City sadtong Oktubre 19, 1938.
Ang Tindalo Tree, nga makita sa Bacolod Public Plaza, isa ka buhi nga testimonya sang pagsaulog sang Bacolod bilang chartered city sa idalum sang Philippine Commonwealth Government.
Ang amo nga puno gintanom mismo ni Anay President Manuel L. Quezon upod kay Mayor Alfredo Montelibano Sr. sa Inauguration Day sang siyudad.