Naga-inuwang ang mga firetrucks kag makit-an ang madamol kag itom nga aso gikan sa nagakasunog nga building sa dalan Quezon, Barangay Poblacion 1 sa syudad sang Sagay, Negros Occidental, Sabado sang hapon.
Base sa imbestigasyon sang Sagay City Bureau of Fire Protection, nagsugod ang kalayo sa ikaduha nga panalgan sang building nga ginapanag-iyahan sang Sagay Star Cable, Star Viewing Network Inc.
Nagdangat sa P7.5M ang danyos sang sunog nga naglawig sang masobra tatlo ka oras.
Ginsiling ni Fire Officer 2, Ian Dave Defiño, chief fire investigator sang Sagay BFP, under investigation pa ang gintunaan sang sunog apang base sa ila inisyal nga imbestigasyon, accidental fire ukon electrical-related ang nasambit nga sunog.
Wala naman sang may nasamaran sa sunog nga nagdangat sa second alarm.
Nagbulig ang fire brigades gikan Escalante City, Cadiz City, Lopez Sugar Inc. kag Bacolod Chamber Volunteer Fire Brigade sa pagtapna sang sunog.
“So far under investigation pa dyapon ang amon nga status sa fire incident regarding dito. Nagkuha pa kami didto evidence kag i-subject pa siya for laboratory.. So subong naga-focus kami sa accidental fire.. accidental siya.. Then ang iya nga kwan is electrical”, suno kay Defiño.