Ang banwa sang La Castellana ang may pinaka madamo nga evacuees dala sang paglupok sang bulkan. Padayon pa ang pag abot sang evacuees sakop sang 6 kilometer radius sang bulkan kag ginalantaw sang alkalde ang pagdagsa pa gid sang mga pumuluyo sa ila nga mga evacuation center.
Gina pasalamatan ni Mayor Rhumyla Nicor Mangilimutan ang suporta kag bulig sang national government, provincial government kag kaupod nga mga alkalde sa sitwasyon nila sa tunga sang paglupok sang Kanlaon. Nag inabot naman ang bulig pero labing gina kinahanglan nila karon suno sa iya ang bugas.
“Actually ang water supply okay lang kay damo ta water tanker nga na-deploy kag ginpahulam sa aton. Ang problema gid ya namon ang bugas. 8,000 plus ang aton evacuees. Bugas kag sud-an, siempre pwede naton sila mapakaon food packs sa morning kay mga delata. Pero sa noon kag ang gab-i tinguhaan gid naton nga malain ang sud-an”, suno kay Mangilimutan.
Ginakulang na ang pondo sang banwa labi na nga sang una pa lamang nga paglupok sang bulkan sang Hunyo na gamit na nila ang ila nga Quick Response Fund.
“Pero nahambal ko naman ang tanan kay Sec Gatchalian. Si Gov gin istorya ko man sa amon concern. Bag-o man lang nag message si Atty Ray Diaz nga ang sa may fuel. Ang first nga paglupok, second and third gamay man lang ang aton banwa. Ang aton 5 percent nga DRRM fund is only 11 million plus. More or less 4.2 million pesos ang 30 percent of the 5 percent. Sa first pa lang nga lupok 71 days ang amon pakaon”, suno kay Mangilimutan.
May 9,288 karon ka pumuluyo ang yara sa 11 ka mga evacution center sa banwa.
Kun ipatuman ang pag evacuate sa mga lugar sakop sang 6 kilometer radius suno kay Mangilimutan may 8,000 families ukon 33,000 individuals ang iga evacuate sa sini nga mga lugar.
Indi na nila masarangan mag accommodate rason nga may mga MOA na sila sa mga kaiping nga lugar kaangay sang Himamaylan, Isabela kag Pontevedra nga kun matabo gid man ini sarang ma accommodate ang evacuees sang sini nga mga LGU.
Bukas ang LGU sa mga donasyon pero naga ayo siya nga mag coordinate sa banwa agudto mangin masulhay kag nagakaangay ang pag pananagtag sang bulig.
Naga ayo man siya sa mga pumuluyo sang paghangup sa sitwasyon kag mag hatag sang kooperasyon.
Sa iya nga monitoring indi malikawan man nga may mga nag batyag na sang respiratory problems dala sang makusog nga baho sang asupre kag abo sang bulkan.
Samtang, gina lantaw man sang alkalde ang posibilidad nga pag decamp ukon pag pabalik na sang mga evacuees nga indi nasakop sang 6 kilometer radius.
Sa siudad sang Bago may pila ka ma evacuees ang ginpapauli sandig sa ginasunod nga Response Protocol. Suno kay DRRM head Dr Merijene Ortizo wala sang lugar sa Bago nga sakop sang 6km radius.