Shadow

Bug-os nga Region 6 ginpaidalom sa red alert bangud sang Bagyo Auring

Ang ini nga mag asawa nga naga puyo sa higad sang taytay sa highway sang Talisay City ang masako na sa pag pang higot sang ila nga trapal. Naga panghanda na sila sa pag abot sang bagyo nga Auring.

Ang ini nga puno sang duldol diri sa may Purok Santan sa Barangay Zone 1 naman sa Talisay sa gihapon ang gin tapsan na sang mga sanga. Tuman na kuno ka dako kag kun mag kusog ang hangin delikado ang mga sanga.

Subong pa lang kuno naga pang handa na sila para sa bagyo. nadudla na sila sa natabo sa ila sang pagbaha sadtong Enero.

Tubtob subong naga pabilin sa gihapon ang halit sang baha sa ila. Sa ila ugasaran yara pa ang mga gamit nga indi na mapuslan bangud nabahaan. Ang ini nga mga ulunan nasulod sa sako kag ginhimo na lang nga basura. May foam pa sa gihapon nga na bulad.

Ang iya kaingud balay nga si Leopoldo Magbanua nagpang higot na sang ila nga mga atop kag nagbutang sang mga pabug-at para indi malupad sang hangin.

Nadudla na sila sang natabo sa ila, gani subong mas preparado na sila basta may naga pakadto nga bagyo.

Sa Lacson Street sa Bacolod, ginpang piod na kag gin pang higtan ang mga billboards.

Humalin kaina sang aga makusog na ang dapya sang hangin kag may lapta lapta na nga pag ulan nga na eksperyensyahan.

Ginpaidalom na sang Office of the Civil Defense sa red alert ang bug-os nga Rehiyon Sais nga naga lakip sang Negros Occidental kag Bacolod City.

Ginpaandaman ang tanan nga mag ulu aligmat. Indi na paghulaton nga magsaka ang tubig antes mag evacuate.

Gina paandaman man ang mga mangingisda nga likawan anay ang magpa lawod kag ang mga yara sa nabukid nga bahin naga puyo nga mangin mabinantayon sa posible nga pagluntad sang landslide.

Leave a Reply

Your email address will not be published. Required fields are marked *

Secured By miniOrangeSecured By miniOrange