Ginpanginwala sang Bacolod City Engineer's Office nga nagalabay sa LGU ang pag-apruba sang variation orders kag dugang nga pondo para sa redevelopment sang Bacolod City Public Plaza kag Fountain Area sang Bacolod City Government Center.
Ini matapos nga nagsabat na ang Tourism Infrastructure and Enterprise Zone Authority ukon TIEZA sa LGU paagi sa isa ka sulat.
Sandig sa sulat, may tatlo ka variation orders nga nagabalor sang masobra sa 28 million pesos ang gindugang sa kuntani kapin 300 million pesos nga contract price para sa redevelopment sang plaza kag BCGC fountain.
Nakaangkon naman ini sang nagkalain-lain ang reaksyon sa publiko kag ginakwestyon ang 4.8 million pesos nga board ups kag 7 million pesos nga pondo sa pag repair sang mga ginguba sang bagyo.
Ginsiling ni City Engr. Loben Ceballos, nga wala nagalabay sa approval sang siudad ang tanan nga pondo nga gina request sang TIEZA sa national government.
Wala man suno sa iya naga request ang local government sang dugang nga pondo kag ang tanan ang nagabase lamang sa assessment sang mga engineer sang TIEZA.
Ginpanginwala man niya ang alegasyon nga may delay sa approval sang mga proyekto bangud padayon man ang ila koordinasyon.
Suno naman kay Bacolod City Mayor Greg Gasataya, bwas maabot ang mga opisyal sang TIEZA sa siudad agud magpsapol sa iya.
Handa man nga magpakita sang mga dokumento ang alkalde sa publiko para sa transparency. Hingyo niya sa TIEZA amo ang ibalik lamang ang katahum sang plaza para sa mga Bacolodnon.
[sibwp_form id=1]